Oyggjatíðindi

Lýðarsvegur 19

188 Hoyvík

 

Tlf: 314411

Teldupostur: oyggjat@olivant.fo

Á myndini síggjast frá vinstru: Bjørghild Djurhuus, býráðslimur, Hans Tausen, P/F Maria Poulsen, Kjartan á Dul, P/F Maria Poulsen, Bergunn Kass, býráðslimur, Helena Dam á Neystabø, býráðslimur, Sjúrður Holm, Articon-Búsetur Í/F, Eyðfinn Guttesen, Articon-Búsetur Í/F, Hanus Joensen, Skúlin á Fløtum, Annika Olsen, borgarstjóri, Jákup Dam, býráðslimur, Jón Sigurðsson, Articon-Búsetur Í/F, Sigurð Ó. Vang, mentamálaleiðari, Birita Wardum, býararkitektur, Jóan Petur Hentze, trivnaðarstjóri, Eivind Danielsen, verkætlanarleiðari, Bjørgfríð Ludvig, kommunustjóri, Mikael H. Viderø, tekniskur stjóri.

Sáttmálin um Skúlan á Fløtum undirskrivaður

Dan Klein --- 12.05.2017 - 09:15

Høvuðsarbeiðstakarasáttmálin um Skúlan á Fløtum er nú undirskrivaður. Í dag hava Tórshavnar kommuna og samtakið Articon – Búsetur Í/F skrivað undir høvuðsarbeiðstøkusáttmála fyri bygging av skúlabygningi á Fløtum.

17. november 2016 skrivaðu Tórshavnar kommuna, ráðgevarasamtakið Eind Í/F og Samtakið Articon–Búsetur Í/F við undirarbeiðstakarunum P/F Maria Poulsen og Sp/f Install undir partalagsavtalu, og farið var undir fasu 1, har verkætlanin hevur verið gjøgnumgingin og tillagað og endaligi byggikostnaðurin ásettur.

Handverkaraútreiðslurnar í høvuðsarbeiðstakarasáttmálanum eru ásettar til 247 mio.kr. Hartil koma aðrir kostnaðir til ráðgeving, innbúgv o.a.

20. des. skrivaðu Samtakið Articon-Búsetur Í/F og Tórshavnar kommuna undir arbeiðstakarasáttmála um jørðarbeiðið til stóru skúlabyggingina á Fløtum. Byrjað var uppá tað arbeiðið í endanum av februar og tað er nærum komið á mál.

Avgrevsturin av økinum var longu framdur í fjør summar, eftir at hakin var settur í 23. mai 2016. Skúlin er teknaður og projekteraður av ráðgevarasamtakinum Eind Í/F.

Sambært tíðarætlanini verður samlaði bygningurin klárur at taka í nýtslu tíðiliga á sumri 2020. Talan er um ein bygning til skúla og frítíðarskúlaendamál, umframt annað mentanarligt virksemi, herundir eina ítróttahøll við áskoðaraplássi.

Í skúlanum koma at vera umleið 850-900 næmingar og eini 100 starvsfólk.

Lesið meiri um verkætlanina her: http://www.torshavn.fo/Default.aspx?pageid=1416