Mýtan um at vit hava heimsins hægstu elprísir heldur ikki
SEV hevur mangan fingið skotið í skógvarnar at hava heimsins hægstu elprísir.
Men so er kortini ikki.
Tað vísir ein samanbering av prísunum í Føroyum og ES-londunum (+ Norra, Estland, Lettland og Litava), sum SEV hevur gjørt.
Samanberingin er fyri 1. hálvár 2011 og 2. hálvár tíðarskeiðið 2008-2010.
Ídnaðurin betur fyri enn húsarhaldini
Sambært henni liggja Føroyar í tyngra endanum, tá tað kemur til elprísin til húsarhald. Hinvegin liggja vit munandi betur fyri, tá talan er um elprísin til ídnaðin.
Samanberingin vísir, at Føroyar - tá tað kemur til húsarhaldsel - 1. hálvár í ár liggja á triðaftasta plássi, aftanfyri Týskland og Danmark, sum hevur dýrastu prísirnar.
Úrslitið er tað sama í tíðarskeiðnum 2008-2010 (2. hálvár).
Tá tað kemur til elprísin til ídnaðin, er myndin eitt sindur øðrvísi. Har liggja Føroyar 1. hálvár í ár á einum 24. plássi (ájavnt við Luxemburg og Belgia) av teimum 31 londunum, ið eru við á listanum, meðan vit liggja á einum 14. plássi í tíðarskeiðnum 2008-2010 (2. hálvár).
Mýtan heldur ikki
Hetta vísir sostatt, at mýtan um, at vit hava heimsins hægstu elprísir í Føroyum, ikki heldur, umenn prísirnir liggja í dýrara endanum. Men tá eigur fjarskotna staðseting og fjarstøða okkara til onnur lond eisini at vera havd í huga.
Samanberingin av elprísunum í stabbamyndum sæst her.
http://www.sev.fo/Default.aspx?ID=1851
