Framgongd í PISA, men framvegis aftanfyri hini Norðurlondini
Bjørn Kalsø, landsstýrismaður í mentamálum, legði á tíðindafundi í morgun úrslitini frá PISA kanningini 2012 fram. Samstundis vórðu PISA - úrslitini almannakunngjørd kring allan heimin í teimum 66 londunum og búskapunum, sum hava verið við í kanningini.
PISA er ein altjóða OECD kanning, sum hevur verið gjørd 3. hvørt ár síðani 2000. Føroyar hava luttikið í 2006, 2009 og 2012.
Endamálið við PISA kanningunum er at máta, hvat 15 ára gomul hava lært av tí, tey hava tørv á at duga fyri at klára seg seinni innan útbúgving, arbeiði og í familju- og samfelagslívi.
Høvuðsniðurstøðurnar í føroysku PISA kanningini hesaferð eru:
Vit hava framgongd í PISA úrslitunum frá 2006 til 2012, men vit eru framvegis aftanfyri hini Norðurlondini
Av londum í PISA 2012 eru vit í niðasta triðinginum í øllum fakøkjum, sum eru støddfrøði, lesing og náttúrulærugreinar
Lutfalsliga stórur partur av okkara næmingunum fáa færri stig enn tað, sum PISA hevur sett sum mark fyri nøktandi førleika
Sera fáir av okkara næmingum hava sera góðan førleika
Bjørn Kalsø, landsstýrismaður, sigur um úrslitið:
“Eg eri fegin um, at vit sum tað einasta norðurlandið hava framgongd á øllum økjum. Nógv átøk eru sett í verk í fólkaskúlanum síðani fyrstu PISA kanningina, og vit fáa nú fyrstu ábendingarnar um, at tað gongur rætta vegin. Tað hevur tí stóran týdning, at allir partar, sum varða av fólkaskúlanum halda á fram við at menna okkara fólkaskúla”.
Nú feskastu PISA-úrslitini fyriliggja fer Mentamálaráðið beinanvegin:
- Saman við skúlaleiðarum at viðgera PISA - úrslitini og at umrøða møgulig átøk í skúlunum. Fundur verður í næstu viku
- At heita á Fólkaskúlaráðið um at gera tilmæli í sambandi við nýggjastu PISA – úrslitini
- At styrkja uppfylgingina og eftirmetingina av átøkunum, sum longu eru sett í verk