Filmur um “Koyrið so á motorin” – nýggj vinnusjónarmið

Vinnuhúsið: Í síðstu viku legði Føroya Arbeiðsgevarafelag nýggjan bókling um vinnusjónarmið – “Koyrið so á motorin” fram fyri politisku flokkunum í Kaffihúsinum í Vágsbotni.

Føroya Arbeiðsgevarafelag hevur gjørt eitt stuttan film um nýggja bóklingin og biðið nakrar politikarar um viðmerkingar í hesum sambandi.

Í bóklinginum eru fýra høvuðstilmæli, og fleiri uppskot til tiltøk eru í bóklinginum:

1. Tað skal loysa seg at arbeiða

Støðan: Skattur á inntøku alt ov høgur, má í størri mun loysa seg at arbeiða – eisini ein tíma eyka.

Tiltøk:

• Meginreglan skal vera at skunda undir, og tað skal altíð loysa seg at arbeiða

• Marginalskatturin á lønarinntøku skal lækkast munandi, og markið fyri, nær ein skal rinda hægsta marginalskatt, skal setast munandi upp

• Skattanýskipan við m.a. lægri marginalskatti, fleiri nýtslugjøldum og ongum skattafrádrátti til sjómenn skal verða framd

2. Skil má fáast á fiskivinnuna

Støðan: Vit missa um hálva milliard árliga

Tiltøk:

• Veiðitrýstið má lækkast alt fyri eitt, so vit um fá ár kunnu økja fíggjarliga avkastið í fiskivinnuni munandi

• Ein nýggjan fiskivinnupolitikk við støði í allari virðisketuni, frá veiðu, til framleiðslu og sølu

• Einki tilfeingisgjald má verða sett í verk, uttan at veiðutrýstið verður minkað, og avlagandi skipanir verða avtiknar

• Stuðulsskipanir til arbeiðsmegina í fiskivinnuni mugu burtur

• Vit mugu herða umsitingina av reglunum um útlendskan ognarrætt í føroysku fiskivinnuni

3. Skilvís almenn fíggjarstýring nú

Støðan: Hall á fíggjarlógini, staðfest bygnaðarligt hall og vaksandi skuld

Tiltøk:

• Umfatandi nýskipanir mugu gerast av almenna geiranum fyri at fáa útreiðslurnar niður og bygnaðarliga hallið má burtur

• Dentur má leggjast á bæði kostnað og dygd í almennu tænastuveitingunum

• Vit mugu leggja dent á fyribyrging, so vit fáa bíligar loysnir til lítlar trupulleikar, í staðin fyri dýrar loysnir til stórar trupulleikar

• Vit mugu styrkja bæði politisku og fyrisitingarligu stýringina av almenna geiranum

4. Vit mugu røkja okkara tilfeingi

Støðan:

• Føroyska arbeiðsfjøldin- lutfalsliga stór og væl útbúgvin, tó ongan fólkavøkstur

• Vit hava stórt fiskatilfeingi og náttúrutilfeingi annars

• Kapitalur er tøkur, men ábøtur

• Vitanarstøðið er á eini leið

Tiltøk:

• Útbúgvingarpolitikkur og fyribyrgjandi tiltøk fyri arbeiðsfjøldina

• Burðardygg veiða og framleiðsla

• Kapitalvinningsskattur lækkast

• Fleiri íløgur í vitan

http://www.youtube.com/watch?feature=player_embedded&v=hxhdfOHIbxo