Venjing í oljubasing gekst væl
UMHVØRVIVERND: Sum ein liður í at menna tilbúgving í sambandi við oljudálking á sjónum, og sum partur av umhvørvisgóðkenningini hjá SEV, varð í dag skipað fyri venjing við elverkið á Sundi.
Landsverk hevur í nøkur ár arbeitt við tilbúgvingarætlanum fyri fleiri av vegatunlunum, og frá ársskiftinum fekk stovnurin eisini ábyrgd av allari tilbúgving á sjónum í sambandi oljudálking. Ábyrgdin fevnir um alt hav- og sjóøki, ið liggur uttan fyri tær kommunalu havnirnar, sum kommunurnar hvør í sær ábyrgdina av. Tilbúgving er eitt øki, ið krevur breitt samstarv millum nógvar myndugleikar og aktørar í samfelagnum, og um hetta skal eydnast, er tað týdningarmikið, at samstarvið virkar væl.
Venjingin í dag byrjaði við eini framløgu, sum fór fram í matstovni á Sundsverkinum. Eftir at Jákup N. Olsen, samskipari frá Landsverki hevði bjóðað vælkomin, fekk Hákun Djurhuus, stjóri á SEV, orðið. Hann segði seg fegnast um, at gongd er komin á arbeiðið við tilbúgving á sjónum, og at SEV sjálvandi vil vera við í tí leistinum, sum verður lagdur fyri hetta arbeiðið.
Heini Eysturoy, leiðari á deildini fyri Infrakervi á Landsverki, vísti á, at síðani Landsverk yvirtók ábyrgdina fyri oljubasing, hevur verið arbeitt við at gera eina ætlan fyri alla tilbúgving á sjónum. Hetta byggir á tann leistin, sum Umhvørvisstovan hevur lagt lunnar undir. Projektleiðari fyri hesum arbeiði er Fríðrik Heinesen, sum í eini framløgu vísti á, hvussu hetta arbeiðið er og verður skipað frameftir. Hann nevndi, hvør útgerð finst í landinum, og hvat tørvur er á at útvega afturat. Somuleiðis vísti hann á tørvin fyri førleikamenning av teimum, sum skulu arbeiða við oljubasing.
Annika Berg, leiðari fyri heilsu, trygd og umhvørvi á SEV, vísti á, at stovurin eigur nakað av útgerð, men hevur samstundis møguleika fyri at leita sær hjálp hjá sløkkiliðum og bjargingarliðum, tá tørvur er á hesum.
Venjingin í dag, sum varð skipað eftir tilbúgvingarætlanini hjá SEV, tók støði í einum hugsaðum leka á einum røri, har tungolja varð pumpað av skipi niðan í ein tanga á Sundsverkinum. Tað gekst væl at skipa arbeiðið, tí longu ein tíma eftir, at alarmurin fór í gongd klokkan 09.38, var báturin Lív hjá Havnar Bjargingarfelag á staðnum og sleipaði eina oljusperring av bryggjuni á Sundi fram við landinum norðureftir, har “oljan” rak. Eftirsum talan var um venjing, varð ístaðin fyri veruliga olju koyrdar børkuflísar á sjógv, sum ikki eru dálkandi fyri náttúruna.
Heini Østerø, átaksleiðari, vísir á, at í Noregi ganga vanliga tveir tímar, frá tí at alarmurin fer í gongd, til útgerðin er fingin upp á pláss. Sæð út frá hesum gekst væl í hond í dag, tí sum áður nevnt tók tað bert ein tíma at fáa oljusperringina út til dálkaða økið.
Allar fráboðanir um oljudálking skulu fráboðast MRCC Tórshavn, sum hevur tlf. 351 300.
