Nógv hevur verið kjakast um muslimar og samkynd seinastu tíðina og tí hevur leikbólkurin InTime Theatre tikið stig til at fara á eina upplýsandi leikferð á skúlar og spælistøð kring Føroyar.

Einmansleikurin "Einki Orð" við Sóley Danielsen hevði frumsýning á Tjóðpallinum í oktober 2014 og fekk sera góð ummæli. Leikurin snýr seg um 24 ára gomlu muslimsku kvinnuna Hannah, ið er samkynd og møtir tí nógvum mótgangi í lívinum. Hon verður sum ung genta gift ímóti sínum vilja við einum harðligum manni. Seinni venda maðurin, familja og vinfólk henni bakið, tá tað kemur fram at Hannah er samkynd.

Umframt at verða sýndur á ymiskum spælistøðum, er endamálið við leikferðini at koma út á skúlarnar og kunna um samkyndleika og islam. Hesi evni verða viðgjørd í leikinum og er tað tí eitt gott høvi hjá framhaldsdeildum og miðnámsskúlum at nema sær kunnleika um hesi evni. 

Tilboð um sýningar verða í hesum døgum sent út á skúlarnar og longu eru nakar sýningar umbiðnar. Fyrireikararnir vóna at enn fleiri skúlar velja at taka av tilboðnum og eisini LGBT Føroyar vónar at stór undirtøka verður fyri leikinum:

Leikurin er ikki dømandi mótvegis nakrari trúðargrein og kemur ikki til nakra beinleiðis niðurstøðu av hvat er rætt ella skeivt. Leikurin eggjar til kjak og gevur áskoðarunum upplýsing um tvey sera viðkomandi evni: muslimar og samkynd. Leikferðin verður kunngjørd í næstum.

Sóley Danielsen, sjónleikari 

Elin Klein Joensen, samskipari

Jenný Lára Arnórsdóttir, leikstjóri og pallsnið

Jákup Bernhard Brim, umseting

Per I. Højgaard Petersen, ljóðmynd

Jón Sonni Jensen, pall grafikkur

Brynhild Jonsdóttir, seyming