‘Føroyar sjálvar – heldur enn hálvar’ eitur okkara boðskapur. Vit gera vart við, at føroyingar og danir ikki hava somu uttanríkispolitisku áhugamál, og at líkasæli ES-politikkurin hjá føroyingum er ein beinleiðis hóttan móti menningini av okkara samfelag. 

Framsókn metir fólkatingsumboðanina sum eitt uttanríkispolitiskt arbeiði. Vit gera vart við, at allur framburður í Føroyum er og verður treytaður av, at vit fáa ræðisrættin á øllum uttanríkispolitiskum málum og sjálvi kunnu umboða okkum á øllum alheimspallum.

Við hesum boðskapi okkara kom valstríðið í stóran mun at snúgva seg um føroyskan uttanríkispolitikk - ella heldur tørvin á honum. Allir flokkar tóktust at hava eina meining um áheitan okkara um at vakna og at taka uttanríkispolitisk mál í álvara. Hetta styrkir okkum í trúnni á, at vit hava tann rætta og viðkomandi politikkin og eru á rættari kós.

Polariseringin í valstríðnum skeiklaði býtið av atkvøðum nakað. Men soleiðis er politikkur eisini.

Vit ynskja Høgna og Sjúrði tillukku við valinum og góðan arbeiðshug, sum vit vóna, at teir brúka í stríðnum fyri at tryggja okkum føroyingum rættin til sjálvi at hugsa og handla í altjóða høpi.

Nú kemur løgtingsvalið. Tá fara vit við einum javnbjóðis liði av góðum monnum og kvinnum aftur at bjóða okkum fram. Við støði í okkara virðisgrundarlagi fara vit heiðurliga og reiðiliga at stríðast fyri at gera Føroyar til eitt tíðarhóskandi samfelag. 

Enn einaferð takk fyri stuðulin!