Heilsu- og Innlendismálaráðið hevur avgjørt, at umsiting av orkumálum verður flutt úr Jarðfeingi til Umhvørvisstovuna. Tá ið nýggja landsstýrið varð skipað vórðu orkumál løgd til landsstýriskvinnuna í heilsu- og innlendismálum at umsita. 

Í hesum sambandi fer stjórin á Jarðfeingi, Petur Joensen,  í starv í Heilsu- og Innlendismálaráðnum sum ráðgevi innan orkumál. Petur Joensen hevur starvast á Jarðfeingi síðani 1997 og hevur verið stjóri á stovninum síðani 2007. Hann tekur við nýggja starvinum 1. januar.

Niels Christian Nolsøe verður settur sum fyribilsstjóri á Jarðfeingi. Niels Christian Nolsøe hevur drúgvar leiðsluroyndir og var stjóri á Elektron árini 1995-2014.

Stjórastarvið á Jarðfeingi verður lýst leyst fyrst í komandi ári.