Borgarstjórin segði nøkur orð við morgunmatarboðið um tær fýra. Brynhild byrjaði í starvi hjá Hans Olaf Hansen, tannlækna í Klaksvík, og seinni avloysti hon tann so kenda Erling Simonsen. Síðan varð hon sett í avloysarastarv fyri Sigrid, sum var tannlæknastjóri í farloyvi. og eftir tað varð hon sett í fast starv.

Síðani oktober 2011 hevur Brynhild eftir áheitan frá Landssjúkrahúsinum og Tannlæknafelagnum starvast á Landssjúkrahúsinum mánadagar. Her tekur hon sær av teim børnum, ið ikki megna at fáa vanliga tannlæknaviðgerð, men noyðast at verða burturdoyvd.

Maria Simonsen byrjaði í 1996. Tá Maria sum 26 ára gomul byrjaði í vardum starvi í barnatannrøktini, so var hetta helst ein av teim fyrstu av slíkum, ið Almannastovan játtaði.

Hon bleiv ein ordans fongur hjá Tannlæknastovuni. Millum annað stýrir hon í stóran mun floksundirvísingi í tannrøkt.

Annika Thorsvig byrjaði sum klinikkassistentur á Tannlæknastovuni. Hon hevði útbúgving sum klinikkassistentur frá Jakku Heinesen, tannlækna, har hon var liðug við útbúgvingina í 1992.

Anniku kenna tey flestu frá móttøkuni, har viðskiftafólkini altíð føla seg vælkomnan altíð verða móttikin við einum blídligum smíli. Hon er eisini teldukøni KT-superbrúkarin á Tannlæknastovuni.

Helga Rúnadóttir Øster er klinikkassistentur í barnatannrøktini. Hon er útbúgvin klinikkassistent úr Aalborg kommunalu tannrøkt í 1998. Hon starvaðist síðani í tannrøktini í Aalborg í 9 mdr áðrenn nøsin aftur varð vend móti heimlandinum.

Dagliga arbeiðið hjá Helgu í tannrøktini er rættuliga víttfevnandi. Hon hevur leingi tikið sær av klinikkin í Kollafirði, og nú tannheilsan í Kollafirði er vorðin so góð, so starvast hon eisini á klinikkini á Argjahamri.