Seinnapartin í gjár skrivaðu Føroya Reiðarafelag og Føroya Skipara- og Navigatørfelag undir semingsuppskot um nýggjan sáttmála, ið gongur fram til 1. apríl 2017. 

Sáttmálabroytingarnar eru í flestu førum átøkar teimum, ið Reiðarafelagið hevur avtalað við Føroya Fiskimannafelag og Maskinmeistarafelagið. 

Javnbýtisprosentið fyri par- og lemmatrolarar fer upp á 27% og javnbýtisprosentið fyri frystilínuskip verður frameftir 40%. Reiðskapsfrádrátturin hjá línuskipum verður strikaður; dagføringar verða gjørdar í umsitingini av inntøkutapstryggingini og frameftir fara fiskiskip ikki at útmynstra úr føroyskari havn um jólini.

Eisini eru serstakar ásetingar fyri tann partin av sáttmálanum, sum viðvíkir limunum í Føroya Skipara- og Navigatørfelag. 

Føroya Reiðarafelag og Skipara- og Navigatørfelagið hava somuleiðis skrivað undir avtalu um fráboðanarfreist í sambandi við arbeiðssteðg. Avtalan er átøk teimum, ið aðrir partar á privata arbeiðsmarknaðinum hava gjørt. 

“Í eini seming eru altíð viðurskifti, ið partarnir kundu hugsað sær annaleiðis og báðir partar hava verið noyddir at geva seg” sigur Anfinn Olsen, formaður í Reiðarafelagnum, sum kortini fegnast um, at sáttmálarnir eru komnir í hús: “Samráðingarnar hava verið drúgvar, men eg fegnist um, at tað eydnaðist at koma á mál, áðrenn makrelvertíðin veruliga er byrjað”.