Rakar GDPR lítla handilin hjá mær?
Handilsvinnufelagið skipar fyri skraddara seymaðum GDPR-tiltaki, sum serliga vendir sær til smærru handlarnar í handilsvinnuni.
Er GDPR ikki bert nakað fyri stórar handlar við stórari skrivstovuumsiting og dýrum KT-skipanum?
Eg havi bert ein lítlan handil, har vit eru nøkur fá fólk, sum loysa allar uppgávurnar í gerandisdegnum. Vit hava fult av gulum lepum við áminningum, nøvnum og telefonnumrum við kassan og á diskinum. Vit hava pakkar við navni og bústaði, sum skulu koyrast út til kundar, liggjandi frammi, og so hava vit eisini eina bók, har vit skriva navn og telefonnummur á kundum, sum læna vørur við heim.
Hevur GDPR-lóggávan so nakað at siga fyri mín handil?
Ja tað hevur hon, tí her hevur tú kanska longu brotið GDPR-lógina tríggjar ferðir.
Hvussu tá? Og hvat skal eg gera, soleiðis at eg sleppi undan stórari bót fyri at bróta GDPR-lógina?
Hetta kanst tú fáa meira at vita um á heimleiðistiltaki, sum Handilsvinnufelagið skipar fyri í Vinnuhúsinum, hósdagin 20. mai kl. 14.
Her fer Jens Christian Olsen, stjóri í Eirin, at greiða nærri frá, hvørjar einfaldar mannagongdir tín handil kann seta í verk fyri at halda ásetingarnar í GDPR-lóggávuni.
Handilsvinnufelagið hevur í hesum sambandi latið gjørt ein faldarar við einføldum tilmælum og mannagongdum, hvat vanligir handlar eiga at gera fyri at halda GDPR-lóggávuna.
Limir í Handilsvinnufelagnum fáa faldaran á heimleiðistiltakinum ella við at venda sær til Vinnuhúsið, eftir at heimleiðistiltakið hevur verið, tann 20. mai.
