Oyggjatíðindi

Lýðarsvegur 19

188 Hoyvík

 

Tlf: 314411

Teldupostur: oyggjat@olivant.fo

Poul Michelsen til Japan

Dan Klein --- 27.01.2018 - 09:45

Mánadagin fer landsstýrismaðurin í uttanríkis- og vinnumálum til Tokyo, har hann skal hitta japanska starvsbróður sín Tarō Kōno. Á fundinum skulu ráðharrarnir fyrst og fremst umrøða møguleikarnar fyri øktum samhandli millum Føroyar og Japan, men eisini hvussu bondini landanna millum kunnu styrkjast á øðrum økjum.

Á ferðini skal landsstýrismaðurin í eisini hitta Tadahiko Ito, umhvørvis- og matvøruráðharra. Poul Michelsen hevur áður hitt bæði Tarō Kōno og Tadahiko Ito.

Umframt fundirnar á ráðharrastigi, eru eisini vitjanir í tjóðartinginum og hjá ein av størstu sjógætisfyritøkunum í Japan á skránni.

“Japan er eitt búskaparligt, tøkniligt og politiskt stórveldi. Fyri Føroyar er tað umráðandi at hava sterk politiskt og vinnulig sambond við lond um allan heim, og í so máta er Japan við sínum 127 milliónum íbúgvum serstakliga spennandi,” sigur Poul Michelsen.