Óprofessionelt og pínligt: Ríkisveiting seinkað minst tveir mánaðir
Tilvitað politiskt drál í landsstýrinum ber nú í sær, at ríkisveitingin fyri januar og februar neyvan verður tøk fyrr enn í mars 2013.
Sambandsflokkurin á Christiansborg:
- Hetta er óprofessionelt og pínligt.
Tað sigur Edmund Joensen, fólkatingsmaður Sambandsfloksins, nú tað er greitt, at ríkisveitingin fyri januar og februar 2013 neyvan kann útgjaldast fyrr enn í mars. Sostatt skal landskassin bíða eftir einari upphædd, sum kann strekkja seg úr 105 upp í 158 mió. kr., umframt rentur. Ríkisveitingin til Føroya er tilsamans 632,2 mió. kr. Á hvørjum ári er greitt, at ríkisveitingin skal ásetast og gjaldast rættstundis. Skjøl, sum Sambandsflokkurin á Christiansborg hevur fingið innlit í, vísa, at landsstýrið kortini hevur bølt oman á málinum.
Í september 2012 kom ein áheitan frá stjórnini um at fáa eitt upplegg frá landsstýrinum um støddina á ríkisveitingini. Svarið kom ikki fyrr enn mánaðarskiftið november/desember 2012.
- Upphæddin, sum nú fer at resta í, koppar tíbetur ikki fíggjarlógini. Pengarnir verða útgoldnir afturvirkandi, men slíkt óskil eigur ikki at koma fyri frá landsstýrisins síðu.
- Øll í politiska umhvørvinum vita, at seinkingin kemst av stríði um vald í samgonguni. Summi brúka hana sum jarnbrot til at trýsta ávís mál ígjøgnum politisku skipanina, vísir Edmund Joensen á.
Hann roknar við, at ríkisveitingin aftur skal brúkast í politiskum trýsti, áðrenn veitingin skal samtykkjast í Løgtinginum í vár.
Ríkisveitingin til Føroya verður vanliga útgoldin í mánaðarligum gjøldum, sum í ár eru knappliga 53 mió. kr.
Í ár eru samlaðu útreiðslurnar hjá danska statinum 1.054 mia. kr. Sostatt er ríkisveitingin 0,6** promill av samlaðu útreiðslunum. Sí talvu:
Dokumentatión á www.edmundjoensen.fo:
Bræv frá Bjarne Corydon til Jørgen Niclasen
Bræv frá Jørgen Niclasen til Bjarne Corydon
