Nakað minni av makreli norðanfyri
Havstovan er júst liðug við kanningar av uppsjóvarfiski í føroyskum og eysturíslendskum øki. Fyribilsúrslitini vísa, at nøgdirnar av makreli og serliga sild eru minni í ár enn í fjør. Tó er støddin á makrelinum góð, meðan miðalvektin av sildini er minni enn í fjør.
Kanningarnar vísa, at makrelurin stendur meira eystarlaga í økinum í ár í mun til í fjør. Sildin var at finna eystur móti markinum eystanfyri og á Íslandsrygginum í ein útnyrðing móti Íslandi.
Svartkjaftur stóð spjaddur í øllum økinum. Miðallongdin var 28 cm og miðalvektin 126 g.
Kanningin er skipað sum altjóða felagskanning undir ICES, har Føroyar luttaka saman við Noregi, Íslandi, Danmark og Grønlandi. Tróndur í Gøtu var leigaður til føroysku kanningarnar.
Samlaða nøgdin av makreli, sild og svartkjafti í Norðurhøvum, har kanningarúrslitini frá øllum rannsóknarskipunum eru við, verður roknað á fundi um miðjan august.
Les alla frágreiðingina her: http://www.hav.fo/PDF/Turar/2018/FRAG_TIG1852.pdf
Jan Arge Jacobsen
1. august 2018
