Nú eru tað ikki mangir dagar til GLS-leiðsluráðstevnan fer av bakkastokki fríggjadagin og leygardagin 18 – 19 januar. Pláss er fyri umleið 400 luttakarum, og til dags dato hava umleið 250 melda luttøku, sum enn er opin. Um ein ynskir at melda til, so kann tað gerast á GLS.fo ella á tlf: 289796. Kostnaðurin fyri báðar dagarnar eru 1.400,00 krónur, og tá er íroknað morgunmatur, døgurði, drekkasteðgir og arbeiðsmappa. 

GLS-Stevnan í ár verður tann tólvta i røðini síðani 2008, tá fyrsta GLS-leiðsluráðstevnan varð hildin í Føroyum. Stevnan hevur altið verið væl vitjað av fólkum í øllum aldri um øll samkomumørk og eisini frá øllum løgum í samfelagnum, og Stig Elttør, sum er formaður í nevdini, sigur við Kristiligu Tíðindasendingina, at hann roknar við góðari luttøku aftur í ár. 

Stig Elttør sigur, at tann stóra broytingin í ár verður, at stovnarin av altjóða GLS- tiltakinum, Bill Hybels, sum altið hevur verið tann, ið hevur sett stevnuna, og sum stevnuluttakararnir altið hava sæð fram til, er ikki longur ein partur av GLS-tiltakinum, og verður tí ikki at hoyra í Norðurlandahúsinum í ár. Kristiliga Tíðindasendingin hevur skilt, at formaðurin í føroysku GLS-nevndini, Stig Elttør, kemur at greiða luttakarunum frá viðurskiftunum í samband við Bill Hybels.

Aftur í ár verður luttøka við fleiri føroyskum tónleikarum og tónleikabólkum, so sum Petur Háberg, bólkurin VSJ og Maria á Lakjuni. Eisini verður felagssangur á skránni. Tað verða tey bæði, Heri Kjærbo og Margaret Dalheim Djurhuus, ið vera stevnuleiðarar. 

Møguleiki verður at keypa bøkur, sum fyrilestrarhaldararnir hava skrivað, og fleiri av teimum eru bestseljandi rithøvundar á bókalistanum hjá New York Times. 

Undanfarnu ár hava fyrilestrarnir altið verið til sølu á fløgu, sum  hevur verið til keyps á stevnuni. Í ár verða fyrilestrarnir ikki á fløgu, men ístaðin verður møguleiki at ogna sær fyrilestrarnar á geyma. 

Skráin fyri stevnuna liggur nú á heimasíðuni hjá GLS, og har sæst, at morgunmaturin er báðar dagarnar frá kl.08:00 til 09:00, og at Tóra við Keldu kemur at hava sín fyrilestur fríggjadagin kl.15:00, og at samrøðan við Hildu Viderø verður leygarmorgunin kl.09:00

Kl.16:00 leygardagin er tólvta GLS-leiðsluráðstevnan av á hesum sinni, og sum vanligt hevur verið, ber til longu tá at melda seg til GLS 2020. 

----------

Ólavur sigur við netavísina Trúboðan: “Eg havi gingið við einum trúboðarakalli í fleiri ár, og havi biðið Gud vísa mær, hvar hann vil brúka meg!” Tá Ólavur fekk fyrispurning frá Sjómansheiminum Ørkini í Reykjavík, um at taka við kallinum har, so var hann ikki í iva, men tók kallið á seg við tað sama.

Tænastan hjá Ólavi verður fjølbroytt við tað, at hann afturat arbeiðinum á Sjómansheiminum, sum umfatar andaktir og føroysk møtir, eisini skal virka millum føroyingar bæði í Reykjavík og aðrastaðni í Íslandi, og kemur eisini at vitja umborð á føroysk skip og at vitja føroyingar, sum liggja á sjúkrahúsi í Reykjavík. Men tey koma at virka í og út frá Sjómansheiminum Ørkin, har Ólavur kemur at hava sítt fasta tilknýti. Fyrstu tíðina koma tey at búgva á Sjómansheiminum.  

At seta ein trúboðara í starv á Ørkini er eitt ynski, sum stýrið hevur havt í fleiri ár, sigur stýrisformaðurin Jonhard Joensen. Ólavur kemur tí ikki at virka sum stjóri ella hava ábyrgd av tí umsitingarliga, men kemur burturav at taka sær av tí andliga arbeiðinum í og út frá Ørkini. 

 

Tollaksmessudag var stórur dagur í nýrenoveraðu kirkjuni í Hósvík, bæði fyri kirkjufólkið og fyri Ólavur og familjuna. Gudstænastan var sett at vera kl.15:00 og var lýst sum  útsendingargudstænasta fyri Ólavi og konu hansara Vónbjørt. Tað var sóknarpresturin í Norðstreymoyar prestagjaldi Bergtórur Hjelm Bjerkhamar, sum prædikaði. Eisini luttóku onnur við upplestri av bíbliutekstbrotum. Síðani var forbøn fyri Ólavi við handaálegging.

Kristiliga Tíðindasendingin hevur tosað við Ólavur í telefonini, og tá var hann staddur í Reykjavík. Hann kom til Reykajvíkar týsdagin 07. januar. Ólavur sigur við Kristiligu Tíðindasendingina, at hann hevur eina royndartíð upp á hálvt ár, og at fyrsta tíðin verður at bróta upp úr nýggjum, tí talan er um eitt nýtt virkisøki hjá føroyska Sjómansheiminum í Reykjavík. 

Um onkur veit um føroyingar, sum eru í sjúkraørindum í Reykjavík, so er ein vælkomin at boða frá hesum til Ólavur Jacobsen, føroyskur Trúboðari í Reykajvík.

Kristiliga Tíðindasendingin ynskir Ólavi til lukku og Harrans signing við nýggja trúboðaraverkinum.