Á hugnaligari samkomu á Eysturoyar Røktar- og Ellisheimi mánakvøldið handaðu umboð fyri Lions Club Eysturoy vegna kommunur og vinnuvirkir í økinum og egna vegna Røktarheiminum venjingartól í samband við at nýggja Endurmenningarstovan letur upp
Tíðindaskriv frá LC Eysturoy:
Í eini 5-6 ár hevur Lions Club Eysturoy saman við Heilafelagnum og Giktafelagnum arbeitt við at fáa sett á stovn endurmenning í Eysturoynni.
Fyrsta stigið var at útgreina, hvørjir møguleikar vóru í økinum og hvussu hesir betri kundu útnyttast og útbyggjast fyri at koma longur fram á leið.
Álit um endurvenjing, viðlíkahaldsvenjing og fyribyrgjandi venjing
Virkisráðgeving veitti eina hjálpandi hond og gjørdi eitt álit, sum var handað táverandi landsstýrikvinnu í almannamálum Rósu Samuelsen í juli 2009. Hetta álit tók støði í endur- og viðlíkahaldsvenjing hjá sjúkuraktum við førleikatarni við teimum hølismøguleikum, sum funnust á Røktarheiminum, men fór tó eitt stig víðari við uppskoti um eisini at skipa fyri fyribyrgjandi venjingum hjá pensionistum.
Hetta skuldi gerast í einum samstarvi millum Almannaverkið og Røktarheimið. Peningur var longu settur av á fíggjarlógini í 2011. Eisini samstarvsavtalan kom skjótt í lag.
Kommunur, vinnuvirkir og Lions Club útvega venjingartól
Men neyðugu venjingartólini vóru ikki. Fyri at verkætlanin tessvegna ikki skuldi koma í drag, setti LC Eysturoy seg í samband við kommunur og vinnuvirkir í økinum fyri saman at útvega neyðugu venjingartólini.
Hetta hevur so givið tað úrslit, at 10 venjingarmaskinur eru komnar og uppsettar á Røktarheiminum og endurmenningin er farin í gongd.
Móttøka verður á Røktarheiminum mánadagin 12. mai kl. 15-17