Uppskotið, ið ásetur eftirlønaruppsparing í Føroyum frameftir, verður nú sent í hoyring, og siktið er at leggja uppskotið fyri Løgtingið í vár Uppskotið til eftirlønarlóg - sjálvur bulurin í føroyska pensjónsreforminum - verður nú sent í hoyring.
Hetta er uppskotið, ið ásetur, hvussu eftirlønaruppsparingin í Føroyum verður frameftir.
Arbeitt hevur verið leingi við uppskotinum, og tað er broytt og tillagað so hvørt. Hetta er tí triðju ferð, at uppskotið til eftirlønarlóg fer út í hoyring.
Í hesum sambandi sigur Jørgen Niclasen, landsstýrismaður í fíggjarmálum:
"Nýggja skipanin hevur stóran samfelagsligan týdning. Hon skal vera stabil og tryggja allar føroyingar í framtíðini. Tí hevur tað stóran týdning, at ymsu hoyringspartarnir koma við afturmeldingum".
Eftirlønarlógin er sjálvur bulurin í pensjónsreforminum, sum ætlanin er at seta í verk.
Endamálið við Eftirlønarlógini er at økja eftirlønaruppsparingina, so fólki ikki fer at tørva fulla fólkapensjón frameftir. Hetta verður mett neyðugt, tí eldru borgararnir fjølgast, og tað ber í sær, at tað verða verri ráð at veita øllum borgarum fulla fólkapensjón frameftir.
Eftirlønarlógin ásetur, at allir føroyingar á arbeiðsmarknaðinum skulu spara upp 15 prosent av lønini til egna eftirløn. Neyðuga uppsparingin verður sett í verk í eini skiftistíð. Byrjað verður við einum prosenti í 2014, og síðani hækkar inngjaldið eitt prosentstig árliga, upp í 15 prosent í 2028.
Nógv gjalda longu til egna eftirløn, men mong spara ov lítið upp ella als ikki.
Roknað verður við, at eftirlønarlógin sum frá líður fer at tvífalda árligu eftirlønaruppsparingina í Føroyum.
Ein politiskur fylgibólkur við umboðum úr øllum politiskum flokkum er við í viðgerðini av uppskotinum.
Ætlanin er at leggja uppskotið fyri Løgtingið í vár. Vegna landsstýrið hava Jørgen Niclasen og Annika Olsen staðið fyri arbeiðnum.
Í politiska fylgibólkinum sita:
Hendrik Old
Rigmor Dam
Rósa Samuelsen
Helgi Abrahamsen
Kristianna W. Poulsen
Sirið Stenberg
Kristina Háfoss
Jákup Mikkelsen
Joen Magnus Rasmussen
Poul Michelsen
Jenis av Rana
Janus Rein
Eftirlønarlógin: http://www.fmr.fo/I2net/Data/Register/0209ff11-ab5d-42ff-8ed7-68b8145134c5/21101720-b612-4b2a-b8cd-786827144249/5bd79b15-00ce-47a2-b993-1c83ae66a9ff.pdf