Vilt tú vera við til at menna føroyskt vinnulív? Trívist tú við skiftandi arbeiðsuppgávum og nógvari ferð í eini politiskari fyrisiting? So er hetta eitt starv fyri teg.
Søkt verður eftir løgfrøðingi til fast starv á Vinnudeildini.
Umhvørvis- og vinnumálaráðið er fyrisiting hjá landsstýrismanninum í umhvørvis- og vinnumálum. Arbeiðsuppgávurnar fevna um at ráðgeva landsstýrismanni og leiðslu, at umboða ráðið í tvørgangandi samstarvi og at lýsa, viðgera og avgreiða mál, sum hoyra stjórnarráðnum til.
Starvið
Arbeiðið fevnir m.a. um
at fyrireika lógaruppskot og kunngerðir
at ráðgeva landsstýrismanninum og leiðsluni
at luttaka í og leiða verkætlanir og umboða stjórnarráðið í ymsum høpi
at samskifta við og stuðla stovnum undir Umhvørvis- og vinnumálaráðnum
Neyvu arbeiðsøkini verða avtalað við leiðsluna við støði í tørvi og førleikum.
Vit bjóða eitt áhugavert, fjølbroytt og avbjóðandi starv í einum umhvørvi á høgum fakligum stigi. Starvið er krevjandi, og neyðugt er at taka tøk, tá ið á stendur. Uppgávurnar eru skiftandi við nógvum samskifti úteftir.
Førleikakrøv
Umsøkjarar skulu hava løgfrøðiligt embætisprógv.
Vit vænta, at tú
hevur góð greiningarevni, innlit í samfelagsviðurskifti og politiskt tev
hevur góð samstarvsevni
arbeiðir miðvíst og sjálvstøðugt
hevur góð evni at samskifta í skrift og talu
ert tænastusinnað/-ur og fleksibul
Umsøkjarar við royndum úr almennari ella privatari fyrisiting kunnu hava fyrimun.
Lønar- og setanartreytir
Starvið verður sett sambært sáttmála millum Fíggjarmálaráðið og Búskapar- og Løgfrøðingafelag Føroya. Setanin fevnir um Umhvørvis- og vinnumálaráðið og stovnar undir ráðnum umframt Løgmansskrivstovuna og onnur stjórnarráð.
Umsóknarfreist
Umsókn við avriti av prógvum o.ø. skal sendast Umhvørvis- og vinnumálaráðnum á uvmr@uvmr.fo og vera ráðnum í hendi í seinasta lagi 6. juni 2022.
Starvið verður sett frá 1. september 2022 ella skjótast gjørligt. Nærri upplýsingar fáast við at venda sær til Pól E. Egholm, deildarstjóra, tlf. 556076.
Vinnudeildin skal tryggja føroyskum vinnulívi kappingarførar og stimbrandi karmar og hevur ábyrgdina av tí vinnuliga lógarverkinum. Millum virkisøkini hjá vinnudeildini eru alivinna, sjóvinna, útlendingamál, integratión, arbeiðsmarknaðarmál, ferðavinna, gistingarhús- og matstovuvinna, loftferðsla, landbúnaður, fjarskifti, matvøruframleiðsla og -útflutningur, djór og djóravælferð, brúkara- og kappingarmál, kolvetni, vinnufeløg, íverksetan og skapandi vinnur.
Vinnudeildin varðar av fleiri almennum stovnum og feløgum: Visit Faroe Islands, Fiskaaling, Rúsdrekkasølu Landsins, Heilsufrøðiligu starvsstovuni, Útlendingastovuni, Skráseting Føroya, Brúkaraumboðið, Búnaðarstovuni, Kappingareftirlitinum, Posteftirlitinum, Tryggingareftirlitinum, Fjarskiftiseftirlitinum, Jarðfeingi, Sjóvinnustýrinum, Filmshúsinum, Tónleikaútflutningsstovuni, Vinnuframa og Framtaki.