BYGGING: Fyrrapartin í dag setti Annika Olsen, landsstýriskvinna í almannamálum, skjøtil á byggingina av sambýli fyri sálarsjúk í Havn.
So upprann dagurin, har spakin varð settur í fyri bygging av nógv umtalaða sambýlinum í Havn fyri sálarsjúk. Tað var Annika Olsen, landsstýriskvinna í almannamálum, sum um 10-tíðina í morgun setti skjøtil á byggiverkætlanina Eystan Heyg.
Aftan á greiddu umboð fyri MAP-arkitektar frá verkætlanini í veitsluhøllini á Landssjúkrahúsinum. Sambært uppskotinum hjá MAP arkitektum, er sambýlið ikki ein bygningur, men heldur ein býlingur.
Í verkætlanini eru pláss fyri 16 íbúðum, sum verða 35 fermetrar til støddar. Fyrsta byggistig fevnir um tær fyrstu 12 íbúðirnar, umframt felagshølir.
Í felagshølunum verður møguleiki fyri at matgera- og eta í felagsskapi við onnur og takast við ymiskt ítriv. Knýtt at felagshúsinum verður eisini eitt felags vaskarí fyri íbúgvarnar.
Útbjóðing hevur verið, og tá lisitatión varð hildin á Landsverki 20. desember 2012, vóru fýra tilboð komin inn. Tilboðini liggja millum 14,7 og 18,6 mió. krónur. Tað er P/F J&K Petersen, sum eigur lægsta boð. Kostnaðarmetingin av fyrsta byggistigi av sambýlinum var 12,2 mió. krónur.
Fakta
Arbeiðsánari: Almannamálaráðið
Byggiharri: Landsverk
Tekniskir ráðgevar: MAP Arkitektar, Verkfrøðingastovan, KJ EL-Ráð og PB Consult
Arbeiðstakari: J&K Petersen