Tað er í veruleikanum kjarnin í langskygdu tilmælunum frá Føroya Arbeiðsgevararfelag um munandi skattalættar í vanliga lønarskattinum, samstundis sum frádráttir og serskipanir verða strikað, sparingar verða framdar í almennu útreiðslunum og nýggj tænastugjøld koma inn í myndina.
Fyri at røkka á mál við hesum tilmælum, so mugu vit hyggja meira enn eitt valskeið og fleiri ár fram í tíðina.
Føroya Arbeiðsgevarafelag leggur í sínum tilmælum dent á, at einki skal gerast í óðum verkum, og tí hevur Føroya Arbeiðsgevarafelag einki tilmæli um at strika rentu- ella sjómannafrádráttir her og nú, sum viðgerðin í miðlunum seinastu dagarnar kann hava givið eina fatan av.
Líkt er tí til, at fleiri annað hvørt hava misskilt ella ikki sett seg inn í langskygdu tilmælini hjá Føroya Arbeiðsgevarafelag, og tí fer Føroya Arbeiðsgevarafelag at vísa til búskaparfrágreiðingina, har langtíðar tilmælini frá felagnum eru nærri útgreinað.