Í sambandi við at nýklaktu føroyameistararnir úr HB leygardagin fara til Runavíkar eftir FM-steypinum bjóðar Tórshavnar Kommuna øllum HB-fjepparum og øðrum borgarum ókeypis bussferð til dystin hjá HB móti NSÍ við Løkin í Runavík.
Tað verða reyðu býarbussarnir, sum koyra til dystin. Farið verður frá Svimjihøllini í Gundadali klokkan 12.30 leygardagin. Dysturin byrjar klokkan 14.
Eftir medalju- og steypahandan í Runavík fylgjast bussarnir við HB-fjepparum og bussurin við HB-hópinum til Havnar, har leiðin gongur beint oman á Vaglið, har Tórshavnar Kommuna kl. 18.30 skipar fyri móttøku uttan fyri ráðhúsið.
Heðin Mortensen, borgarstjóri, ber fram røðu og heilsar HB, sum í ár hevur tryggjað sær sítt 22. meistaraheiti, og formaðurin í HB og umboð fyri spælarar fara eisini at siga nøkur orð. Undir móttøkuni fer Havnar Hornorkestur at spæla.
Eftir móttøkuna hevur Tórshavnar Kommuna bjóðað øllum HB-hópinum, nevndum og øðrum hjálparfólkum í HB til døgurða í Mullers Pakkhúsi.