Ført hevur verið fram, at hitapumpur minka ikki um føroyska oljuinnflutningin, tí tær bara flyta oljunýtsluna frá privathúsum inn á motorverkið hjá SEV á Sundi, ella á Vágsverkið í Suðuroy. Um hugt verður eftir veruligum tølum, er tó ongin ivi um, at hitapumpur minka oljuinnflutningin sera nógv.

Í mun til tað el, sum hitapumpur brúka, kemur fleirfalt so nógv hitaorku úr umhvørvinum. Tí vil ein hitapumpuna altíð brúka minni olju enn eitt oljufýr, hóast alt el sum hitapumpan brúkar verður framleitt úr olju.

Hitapumpur í Føroyum geva enn størri fyrimun, tí framleiðslan hjá SEV er blivin grønari seinnu árini. Í 2015 komu í meginøkinum 66% av elorkuni úr vatni og vindi. Fyri allar Føroyar er talið 60%. Mest orka fæst úr vindi og vatni um veturin, meðan meira olja verður brúkt um summarið. Mynd 1 niðanfyri vísur hvussu framleiðslan hjá SEV í meginøkinum er býtt millum vind, vatn og olju fyri hvønn mánað í 2015.

Tørvurin á hitaorku er sjálvandi størstur um veturin. Ein vetrardagur er meira enn dupult so orkukrevjandi sum ein summardagur. Mátað hitanýtsla í einum sethúsum hvønn mánað í 2015 er víst í mynd 2 niðanfyri. 

Samanfallið millum grøna partin í framleiðsluna hjá SEV og hitatørv ger, at hitapumpur er ein funnin fressur til at gagnnýta grønu orkuframleiðsluna hjá SEV.

Um framleiðslan hjá SEV verður samanhildin mánað fyri mánað við hitatørvin í sethúsum fæst, at eitt oljufýr hevði brent 2289 litur gassolju meðan ein hitapumpa, sum framleiðir somu hitanøgd, hevði brúkt el svarandi til 418 litur tungolju hjá SEV. Sostatt minkar oljunøgdin við 82%, tá flutt verður frá oljufýr til hitapumpu. SEV innflytur tungolju til helvtarprís í mun til gassolju. Sostatt minkar ein hitapumpa í meginøkinum útreiðslurnar til oljuinnflutning niður í ein tíggjundapart í mun til eitt oljufýr.

Um húsini stóðu í Suðuroy, har elframleiðslan í 2015 var 16% vatn og 84% olja, hevði minking í oljunøgd verið 49% og í kostnaði 75%. 

Samanumtikið eru hitapumpur ein góð loysn at gagnnýta grønu orkuna hjá SEV á skilagóðan hátt. Samstundis minkar oljuinnflutningurin munandi.

Fyritreytir í útrokning omanfyri eru: gassolja 10 kWh/litur, tungolja 11 kWh/litur, oljufýr 0,82 effektivitet, SEV 0,41 motoreffektivitet, hitapumpa COP=3.