Nýggja tænastan vísir eitt úrval av samfelagsviðkomandi hagtølum. Hesi fevna eitt nú um fólk, løn, inn- og útflutning, avreiðingar, gistingar, prístalið o.a. Tølini verða víst í grafum, soleiðis at tey eru løtt at skilja. Grafarnir lýsa gongdina í einum stuttum og einum longri tíðarskeiði. Grafarnir verða dagførdir sjálvvirkandi, so skjótt sum nýggjastu tølini eru tøk.

- Hagvarpið er ein liður í arbeiðinum hjá Hagstovuni at styrkja almenna hagtalskunnleikan um føroyska samfelagið. Vit arbeiða støðugt við at gera hagtølini meira atkomulig og lættari at brúka, sigur Sigurd Poulsen, stjóri á Hagstovuni.

Hagvarpið kann eisini snikkast til at vísa hagtøl, ið eru serliga viðkomandi fyri títt virksemi. Á kommunuskrivstovum kann Hagvarpið t.d. nýtast at vísa fólkatal, burðaravlop, til- og fráflyting í kommununi. Á undirvísingarstovnum kann Hagvarpið eitt nú vísa gongdina hjá ungum fólki innan ymisk øki. Á tíðindaredaktiónum kunna hagtalsøki vísast , sum eru serliga tíðindaaktuel. Í fyritøkum kann gongdin í vinnuni og vinnugreinini vísast. Møguleikarnir og samansetingarnar eru nógvar. Hagstovan kann snikka Hagvarpið til mótvegis gjaldi. Hevur tú hinvegin tíð og førleika, kanst tú sjálv/ur seta tænastuna saman, so hon passar til tín tørv.

- Vit eru spent at síggja, hvussu tænastan fer at verða nýtt, sigur Sigurd Poulsen.

Tú kanst síggja Hagvarpið á www.hagvarp.hagstova.fo.