Oyggjatíðindi

Lýðarsvegur 19

188 Hoyvík

 

Tlf: 314411

Teldupostur: oyggjat@olivant.fo

Christelle og Clement hava eisini ferðast eitt sindur í Føroyum. Her eru tey í Saksun.

(tíðindamynd)

Fronsk lesandi á Havstovuni

Í summar hava Christelle Nivoix og Clement Buttarelli, sum eru djóralæknalesandi á veterinerskúlanum í Toulouse í Fraklandi, verið í starvsvenjing á Havstovuni í seks vikur. 

Í samband við djóralæknalesturin í Touluse verður kravt, at tey lesandi í seks vikur skulu í starvsvenjing á útlendskum granskingarstovni. Christelle og Clement settu seg tí í samband við Havstovuna, har tey byrjaðu um miðjan juni. 

Christelle hevur verið á Uppsjóvardeildini, har hon fyrstu tríggjar vikurnar lærdi at kanna magar á sild, makreli og svartkjafti. Síðstu tríggjar vikurnar hevur hon verið við Jákup Sverra á makrelkanningum, har hon hevur kannað magar á veidda fiskinum. 

Clement hevur verið á Fuglakanningardeildini, har hann serliga hevur hjálp til við feltarbeiðinum í samband við merking av fugli. Eisini hevur Clement hjálp til við árligu fuglateljingunum av lomviga, ritu og havhesti í Høvdanum í Skúvoy. 

Nú starvsvenjingin er um at vera liðug skulu Christelle og Clement skriva frágreiðing um arbeiðið, tey hava gjørt í starvsvenjingini. Frágreiðingin skal leggjast fram og próvdømast á djóralæknaskúlanum aftaná summarfrítíðina. 

Havstovan hevur verið glað fyri at havt Christelle og Clement í starvsvenjing og takkar teimum fyri tíðina.