Fara undir at byggja íbúðir til ung við serligum avbjóðingum í Havn
Nú verður farið undir at byggja íbúðir ella eitt sokallað ungdómspensjónat til ung við serligum avbjóðingum. Tað er greitt eftir at játtanarkarmarnir fyri 2014-2018 eru almannakunngjørdir.
Fakfólk hava í fleiri ár gjørt vart við, at neyðugt er við íbúðum til ung við serligum avbjóðingum, sum eitt nú hava verið á stovni í Danmark. Tá teirra fyriskipan er lokin, hevur ofta einki tilboð verið at venda aftur til í Føroyum.
Talan verður um eitt mennandi tilboð, har tey ungu, undir tryggum kørmum, kunnu brynjast og mennast til eina sjálvstøðuga vaksnamannna tilveru.
Nýggju íbúðirnar eru eisini ein liður í ætlanini hjá landsstýriskvinnuni í almannamálum, Anniku Olsen, at fáa fleiri tilboð til børn og ung við serligum avbjóðingum í Føroyum heldur enn uttanlands.
- Vit eiga sum mest møguligt at skipa fyri tilboðum og kørmum her heima, heldur enn at senda børn og ung av landinum, sigur landsstýriskvinnan í viðmerking.
Settar eru 8,3 mió. av um árið í 2014 og 2015 til nýggju íbúðirnar, sum eftir ætlan verða bygdar í Havn.
