Á myndunum síggja vit Selmu Ellingsgaard, forkvinnu í Starvsmannafelagnum og Helenu Johannesen, forkvinnu í Súluni, tá ið tær undirskrivaðu samanleggingaravtaluna fyrrapartin fríggjadagin.
Fakfeløgini Súlan og Starvsmannafelagið løgd saman
Fakfeløgini Súlan og Starvsmannafelagið løgd saman í gjár.
Fakfelagið hjá kabinustarvsfólkunum hjá Atlantic Airways og Starvsmannafelagið hava avgjørt at leggja saman. Samanleggingaravtalan varð undirskriva í hølum Starvsmannafelagsins fyrrapartin
Súlan, sum hevur verið fakfelag hjá kabinustarvsfólkunum í føroyska flogfelagnum – tað sum vit best kenna sum flogternur – samtykti á eykaaðalfundi fyrr í vikuni at leggja felagið saman við Starvsmannafelagnum.
Nevndin í Starvsmannafelagnum samtykti eisini samanleggingina fyrr í vikuni.
Í báðum førum vóru samtyktirnar einmæltar.
Feløgini verða løgd saman við virknaði frá í gjár, 8. januar 2016.
Ítøkiliga merkir samaleggingin, at feløgini ganga saman undir m.a. navninum og reglunum hjá Starvsmannafelagnum. Tey útvið 30 kabinustarvsfólkini, hava verið limir í Súluni, eru nú limir í Starvsmannafelagnum við fullum limarættindum og limaskyldum.
Nevndin í Súlunum fer frá, men heldur kortini fram sum fakbólkur í Starvsmannafelagnum, sum frammaundan hevur fleiri slíkar fakbólkar.
Nevndin í Starvsmannafelagnum heldur fram sum fyrr.
Súlan hevur sáttmála við Føroya Arbeiðsgevarafelag. Starvmannafelagið hevur nú yvirtikið tað formliga sáttmálaræði mótvegis Føroya Arbeiðsgevarafelag.
Galdandi sáttmáli hjá Súluni fer úr gildi 1. november í ár.
Feløgini fegnast um samanleggingina.