Eg má siga, at eg ongantíð havi skilt, hví tað er so áhugavert fyri veljaran at hoyra og síggja

veljarakanningar.

Í mínum eygum degraderar ein veljarakanning politikk til eina kakofoni av tølum, ið einans

siga nakað, um hvør veðrur, ið vigar mest. Vilt tú hava onkran annan veðr at viga mest, so

mást tú heldur skunda tær at geva honum júst títt grasstrá.

Nei, koyr á bøin.

Eftir mínum tykki snýr politikkur seg um, ella eigur í øllum førum at snúgva seg um, tað

samfelagið, vit øll ynskja okkum. Men sum Kirkegaard segði: Lívið skal livast frameftir, men

skiljast aftureftir. Soleiðis snýr politikkur seg so sanniliga eisini um tað samfelagið, vit liva í.

Júst her og nú. Um hvussu vit eru komin higar. Og um hvørji tey eru, ið hava leitt okkum

higar.

Nógv umstrídd mál hava verið í løgtinginum seinastu árini, og tað er ein sannroynd, at

helmingurin av sitandi tingfólkum stillar upp aftur. Hevði tað ikki verið viðkomandi hjá

fjølmiðlunum heldur, at lagt orkuna í at gera hagtøl yvir, hvør hevur atkvøtt fyri/ímóti/blankt í

teimum stóru og umstríddu málunum?

Hetta hevði verið áhugaverd, aktuel og faktuell vitan hjá veljaranum. Vitan, sum hevði verið

ógvuliga góð at havt, tí á hendan hátt kundu veljararnir funnið út av, um politikararnir, tey

valdu fyri brátt 4 árum síðani, hava virkað út frá áskoðan veljarans. Ella um teir hava gjørt

nakað heilt annað.

Come on, miðlar. Tølini liggja inni á logting.fo. Skapið gjøgnumskygni fyri veljaran, so hann

kann atkvøða á einum upplýstum grundarlagi. Tí skal veljarin vita, hvør kós er best at seta,

og hvønn, ið dugir at halda kósina, ja so mugu vit fyrst vita, hvar vit standa sum samfelag

beint nú og hvør, ið hevur leitt okkum higar.

Gamaní, mann kann eisini gera veljarakanningar, koyr ahead. Men tær siga einki sum so.

Tað er, sum um valið verður gjørt til ein fótbóltsdyst, har liðið við teimum flestu fjepparunum

vinnur. Heldur enn liðið, sum spælir best.

Veljarakanningar eru óneyðugt og dýrt undirhald. Vit fáa jú kortini tað rætta úrtslitið

valkvøldið, so hví brúka krútið til nakað, sum kemur heilt av sær sjálvum? Harafturat vita vit,

at veljarakanningar kunnu hava neiliga ávirkan á eitt val. Fólk, sum ætla sær at velja ávísan

flokk, setast heima, tí at flokkurin stendur seg so væl í kanningunum. Tað er okkurt

grundleggjandi galið, tá tað er ein meiningarkanning og ikki politikkur og politisk avrik sum

avgera, hvør skal stjórna einum landi.

Øll vita, at fjølmiðlarnir her á landi hava ógvuliga avmarkaðar resursur. Eg haldi, at tað hevði

tænt okkum øllum best, um miðlar og kanningarstovnar brúktu fólk og pening at skapa

gjøgnumskygni í valstríðnum. So kundi veljarin farið á val á upplýstum grundarlagi. Heldur

enn at futta alt av í einum festligum, og í ringasta føri skaðiligum undirhaldsfýrverkaríi.

Góðan arbeiðshug fjølmiðlar, gott val til tykkum veljarar og ein kærkomin heilsan til øll

tykkum djørvu nýuppstillaðu!