Oyggjatíðindi

Lýðarsvegur 19

188 Hoyvík

 

Tlf: 314411

Teldupostur: oyggjat@olivant.fo

Bókaútgáva: Í Bókmentagrønanum

Dan Klein --- 02.06.2018 - 08:30

Fróðskapur hevur givið út bókina Í Bókmentagrønanum – Tríggjar greinir um nýggjan føroyskan skaldskap. Setursrit 9. Permumyndin er málningur hjá Hansinu Iversen. Bókin er 141 blaðsíður og fæst til keyps í bókabúðunum fyri 230 kr.

Í bókini eru prentaðar tríggjar ritgerðir, sum viðgera nýggjan føroyskan skaldskap. Ritgerðirnar eru styttar eitt sindur og tillagaðar, so tær eru at líkna við greinir og hóska einum almennum lesaraskara. Heitið, Í bókmentagrønanum, sipar til navnorðið “ein grøni”, sum verður brúkt um eitt grønt øki, eina gróðrargóða grasfløtu.

Silja Aldudóttir lýsir og greinar í ritgerðini Men tað lekur millum vitið, skilið og kjøtið, hvussu kroppurin sum lívrunnin og ólívrunnin eind er evni í yrkingum eftir Sissal Kampmann.

Ragnar Sigrunarson kannar grotesk stílbrigdi í trimum stuttsøgum úr tíðarritinum Vencli nr. 15/2015. Tað eru stuttsøgurnar “Sexologurin” eftir Ludvík á Brekku, “Sunnudagur” eftir Sólrún Michelsen og “Fellan” eftir Oddfríð Marna Rasmussen. Ritgerðin hjá Ragnari hevur heitið Uttan mál og mark.

Lydia Didriksen viðger í ritgerðini Eg eri – ikki eg – eri eg eitt rák, sum hevur nøkur ár á baki,  men framvegis er sjónligt og verður endurnýggjað, nevniliga at rithøvundar skriva um seg sjálvar og brúka síni egnu nøvn í verkum, sum fáa heitið skaldsøga. Í ritgerðini verður skaldsøgan hjá Silviu Henriksdóttur Sig at du lyver frá 2011 greinað og viðgjørd við støði í einum kjaki um, hvussu nýggja tekstslagið kann skilmarkast og greinast bókmentavísindaliga.

Bergur Djurhuus Hansen, lektari, og Sanna Andrassardóttir Dahl, vísindaligt hjálparfólk, á Føroyamálsdeildini á Fróðskaparsetrinum hava ritstjórnað ritið.

Setursrit er ein ritrøð við greinum eftir granskarar og lesandi á Fróðskaparsetrinum. Evnini eru sprottin av námi og gransking, og útgávan er ætlað granskarum og lesandi á Setrinum, næmingum og lærarum við teir hægru skúlarnar og øllum áhugaðum. 

https://setur.fo/page-samples/news/news-single/news/bokautgava-i-bokmentagroenanum/