Eins og mongu undanfarnu árini, skipar Bátafelagið á Toftum fyri bátafestivali fyrsta leygardag í mai, og tað er sum kunnugt í morgin 2. mai.

Longu í gjár hósdagin lat kampingøkið við Toftagjógv upp, eins og vitjandi bátar sama dag høvdu møguleikar fyri at fáa pláss í bátahavnini. 

Í morgin leygardagin verður lagt til brots, og sum altið møtast allir bátarnir í Skálafirði og sigla út á Toftir klokkan 12.30. Fyrireikarnir vísa á, at samband er við førarabátin á kanal 8.

Tað verður forkvinnan í mentanarnevndini í Nes kommunu, Elin á Torkilsheyggi, ið tekur ímóti og bjóðar vælkomin. Harmonikuliðið spælir, og borðreitt verður við suppu við tilhoyri í matarhøllini á flakavirkinum.

Av øðrum á skránni er framsýning av ymsum livandi fisksløgum í Turkihúskjallaranum, hoppiborgum á festivaløkinum, rodeotarvi, eins og hyli við súkklubátum.

Tofta Kvinnufelag og Tofta Talvfelag skipa fyri køkutombula í teltinum, eins og møguleiki verður fyri at mála andlit. Somuleiðis eru bæði pysluvogur og kaffisøla.

Væl umtóktu festivalbúffarnir verða sjálvandi at fáa, og Hilmar Jan Hansen verður frásøgumaður í Stóratelti.

Av øðrum á skránni er skattaveiða, kórsangur, solosangur og sangur við løgtingsmonnum úr Eysturoynni. Forkunnugi vágabólkurin, Tinganest, fer at spæla í Stóratelti, og handlarnir Navia, Insito og Shari skipa fyri mótasýning.

Endin á bátafestivalinum er sum altíð dansurin í Stóratelti við sangi og tónum frá vælumtókta contrykonginum, Halluri Joensen.

Fyrireikararnir hava gjørt alt fyri, at Bátafestivalurin fer at eydnast væl og gleða seg til at taka ímóti nógvum gestum í morgin leygardagin 2. mai.

Skráin fyri Bátafestivalin 2015 sær soleiðis út:

12.30 Bátarnir eru komnir inn í Skálafjørð og seta kós móti Toftum

14.00 Bátarnir koma í bátahylin á Toftum

14.00 Framsýning av livandi fiskum í Turkihúskjallaranum

15.00 Hoppiborgir, rodeotarvur og hylur við súkklubátum 

15.00 Køkutombula við Tofta Kvinnufelag og Tofta Talvfelag

15.00 Andlitsmáling

15.00 Pylsuvognurin letur upp

16.00 Kaffisøla er opin

16.00 Sølan av teimun vælumtøktu festivalbúffunum letur upp

16.00 Hilmar Jan Hansen sigur frá

16.00 Skattaveiða

16.00 Kórið í Undirhúsinum syngur

16.30 Løgtingsmenn í Eysturoynni syngja

17.00 Petur Hans Hansen syngur

17.30 Bólkurin Tinganest spælir

18.30 Mótasýning við Navia, Insito og Shari

23.00 Stóri festivaldansurin við Halli Joensen byrjar