Átaluvert: ongin føroyingur á hvalaveiðufund
Sambandsflokkurin á Christiansborg: Tað er átaluvert, at Landsstýrið ongi føroysk umboð sendir á fundin í Altjóða Hvalaveiðunevndini sunnudagin at verja føroysk áhugamál og at vera mótvekt til umhvørvisfelagsskapir, sum í hesum døgum eru í hernað ímóti Føroyum
- Vit eiga dugnalig embætisfólk, og tað er so upplagt, at okkurt teirra verður sent á fundin í Altjóða Hvalaveiðunevndini, ið byrjar sunnudagin.
Hetta sigur Edmund Joensen, fólkatingsmaður fyri Sambandsflokkin, í sambandi við, at Landsstýrið ætlar, at ongi føroysk umboð skulu vera partur av ríkisins sendinevnd, ið fer á árliga fundin hjá Altjóða Hvalaveiðunevndini, IWC.
Fundurin í IWC verður í Panama City 1.-6. juli.
Júst í hesum døgum streingja umhvørvisfelagsskapir á fyri at sáa split í støðuna í Ríkisfelagsskapinum, har ið øll trý londini standa saman um hvalaveiðupolitikkin.
Felagsskapirnir leggja við herferðini "Breaking Ranks" trýst á ES-landið Danmark fyri at fáa Danmark at taka undir við ES-hvalaveiðupolitikki og harvið at sleppa felags støðuni í Ríkisfelagsskapinum.
Harumframt seta felagsskapirnir Føroyar í eitt keðiligt ljós sum eitt illavorðið lítið land, ið skapar konfliktir í Altjóða Hvalaveiðunevndini.
- Hetta átti at sagt Landsstýrinum, at tað er neyðugt hjá føroyingum at møta upp í IWC sum partur av ríkisins sendinevnd. Almennu Føroyar mugu hava eitt munagott mótspæl til ódámligu og manipulerandi herferðina, og føroysku áhugamál mugu verjast best møguligt, sigur Edmund Joensen, fólkatingsmaður.
Hann heitir á Landsstýrið um at umhugsa støðu sína av nýggjum og at senda føroysk umboð á fundin hjá IWC í Panama City.
Les eisini:
Frágreiðingin "Breaking Ranks"
Greinir:
Her eru heilarnir aftan fyri hvalaherferðina
Villeiðandi herferð: grønlendingar veiða hval til fullar frystiboksir** Hvalafriðing í Suðuratlantshavi lítlan týdning fyri Føroyar
Fýra umhvørvisfelagsskapir gera felags álop á Føroyar
Konflikt áðrenn hvalaveiðufund má ruddast av vegnum
Tak niður:
Plakat/innbjóðing til kjakfundin í Europaparlamentinum um Føroyar, Danmark og Grønland
Slóðir:
CITES-konventiónin
Pro Wildlife-heimasíða
Environmental Investigation Agency (EIA) um "Breaking Ranks"
Whale and Dolphin Conservation Society (WDCS) um "Breaking Ranks"
Humane Society International (HSI) um "Breaking Ranks"
Altjóða Hvalaveiðunevndin (IWC) um árliga fundin í juli 2012
Skjøl til fundin hjá IWC í juli 2012
Europaparlamentið
Meira:
Edmund Joensen á Facebook
