32.000 krónur til samrøðubólk
Lions Club Tórshavn hevur handað einum samrøðubólki í Margarinfabrikkini í Havn ágóðan av árliga jólahugnanum í Viðarlundini í Havn, sum var 32.000 krónur.
Fyrsta sunnudag í advent á hvørjum ári skipar Lions Club Tórshavn fyri jólahugna í Viðarlundini í Havn, har fólk eitt nú kunnu keypa jóladekoratiónir, tilfar til dekoratiónir og annað, samstundis sum jólahugni við ljósketum, báli, ljósblussum, horntónleiki og kakao, bollum, vaflum og øðrum er í hásæti.
Ágóðin av hesum familjutiltaki fer – eins og vanligt er, tá Lions Club Tórshavn skipa fyri – til eitt gott og vælgerandi endamál, og tað sum kom inn í desember hesaferð var oyramerkt til ein samrøðubólk, sum er skipaður í Margarinfabrikkini í Havn fyri børn hjá foreldrum, ið eru farin hvør til sítt.
Salua Manai og Ingvør í Haraldsstovu, sum báðar eru námsfrøðingar í Margarinfabrikkini í Havn, hava tikið stig til samrøðubólkin, ið skal gera tað lættari hjá børnunum at skilja og góðtaka sína støðu, tí tey har kunnu kenna seg aftur í tí, sum onnur børn siga frá – alt samalt við fullari tagnarskyldu.
Tað vóru eisini tær báðar, ið tóku ímóti kekkinum upp á 32.000 krónur, ið Óla Jákup Kristoffersen vegna Lions Club Tórshavn handaði teimum á samkomu nú um dagarnar. Samstundis takkar Lions Club Tórshavn øllum, sum stuðlaðu og vístu tiltakinum vælvild.
